ព័ត៌មានជាតិ

CAMSOC ស្នើប្រព័ន្ធផ្សព្វផ្សាយជាតិជួយបំផ្ទុះការផ្សព្វផ្សាយឱ្យកាន់តែខ្លាំងក្លានៃ​ដំណើរ​ឆ្ពោះទៅ​ស៊ីហ្គេម-អាស៊ានប៉ារ៉ាហ្គេម ២០២៣

គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ ហៅកាត់ គ.ជ.ប.អ (CAMSOC) បានរៀបចំវេទិកាជាមួយប្រព័ន្ធផ្សព្វផ្សាយ ផលិតកម្មទូរទស្សន៍ ពិធីករ-ពិធីការិនី នៅពហុកីឡដ្ឋានជាតិមរតកតេជោ នៅថ្ងៃទី២៣ ខែមិថុនា ឆ្នាំ២០២២ ដើម្បីជំរុញ​ឱ្យគ្រប់ប្រព័ន្ធផ្សព្វផ្សាយទាំងអស់ជួយ បំផ្ទុះការផ្សាយឱ្យកាន់តែខ្លាំងក្លានៃដំណើរ​ការឆ្ពោះទៅ​ទទួលរៀបចំធ្វើជាម្ចាស់ផ្ទះ ការប្រកួតកីឡាស៊ីហ្គេម លើកទី៣២ និងការប្រកួតកីឡាជនពិការ «អាស៊ានប៉ារ៉ាហ្គេម» លើកទី១២ ឆ្នាំ២០២៣ ជាប្រវត្តិសាស្ត្រដំបូងរបស់ព្រះរាជាណាចក្រ​កម្ពុជា​ឱ្យទទួលបានជោគជ័យ។

 

វេទិកាសារព័ត៌នេះត្រូវបានប្រារព្ធធ្វើឡើង ក្រោមវត្តមានដ៏ខ្ពង់ខ្ពស់របស់ឯកឧត្តម​បណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍ CAMSOC និង​ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអនុប្រធាន CAMSOC និងក្រោមការ​រៀប​ចំរបស់ CAMSOC និងក្រសួងព័ត៌មាន។

 

ឯកឧត្តមបណ្ឌិត ថោង ខុន បានមានប្រសាសន៍ថា «ការរៀបចំវេទិកាសំណេះ​សំ​ណា​ល​​នេះពិតជាមានសារៈសំខាន់ណាស់ ហើយគោលដៅសំខាន់ គឺចង់ឱ្យអ្នកទាំងអស់គ្នា ក្នុង​នាមគ្រួសារតែមួយ ជាអ្នកផ្សព្វផ្សាយព័ត៌មានចូលរួមជំរុញការផ្សព្វផ្សាយក្នុងក្របខ័ណ្ឌ​​ជាតិ​ឱ្យបានកាន់តែសកម្មភាថែមទៀតនៃដំណើរឆ្ពោះទៅទទួលរៀបចំធ្វើម្ចាស់ផ្ទះការប្រ​កួត​កីឡា​ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣»។ ឯកឧត្តមបណ្ឌិត ថោង ខុន គូសបញ្ជាក់ទៀតថា ដំណើរការត្រៀមឆ្ពោះទៅធ្វើម្ចាស់ផ្ទះ ស៊ីហ្គេម ឆ្នាំ២០២៣ គឺនៅសល់ពេលត្រឹម ៣១៦ថ្ងៃ​ទៀត ដែលពេលវេលានេះមិនមែនជាពេលវេលាច្រើនប៉ុន្មាន ប៉ុន្តែក៏វាមិនខ្លីពេកដែរ ដូច្នេះ​ឯកឧត្តមបានស្នើឱ្យប្រព័ន្ធផ្សព្វផ្សាយជួយជំរុញបន្ថែមនូវផ្សព្វផ្សាយឱ្យកាន់តែផុសផុលជូនដល់ប្រជាពលរដ្ឋ។ ឯកឧត្ដមបានបន្ថែមថា ការងារជំរុញ និងការបញ្ជ្រាបការយល់ដឹងរបស់​បណ្តាយផ្សព្វផ្សាយអំពីដំណើរឆ្ពោះទៅស៊ីហ្គេម-អាស៊ានប៉ារ៉ាហ្គេម ជាប្រវត្តិសាស្ត្រដំបូងរបស់​កម្ពុជា គួរតែត្រូវបានបង្កើតទៀត តាមរយៈការផ្សព្វផ្សាយព័ត៌មាននេះ។

 

«សូមឱ្យបណ្ដាសារព័ត៌មានទាំងអស់មេត្ដាជួយដុតដៃដុតជើង ដូចដែលបានជម្រាបជូន​ក្នុងវេទិកា គឺជួយផ្សព្វផ្សាយដោយស្ម័គ្រចិត្តជួយជំរុញអំពីបញ្ហាអ្វីដែលជាគោលការណ៍ CAMSOC ជាពិសេសគឺជំរុញការផ្សព្វផ្សាយព័ត៌មាននូវយុទ្ធនាការជាតិសំខាន់ៗ ដូចជាប្រជា​ជនម្នាក់លេងកីឡាមួយមុខ ដើម្បីជំរុញធ្វើម៉េចឱ្យចូលរួមចលនាកម្ពុជាស្អាត ចូលរួមការកាត់​បន្ថយ​គ្រោះថ្នាក់ចរាចរណ៍ កាត់បន្ថយគ្រឿងញៀន ដូចដែលអាជ្ញាធរគ្រឿងញៀន និង​ក្រសួងមហាផ្ទៃលោកបានខិតខំធ្វើរៀងរាល់ថ្ងៃនេះ»។ នេះជាការអះអាងបន្ថែមរបស់ឯកឧត្ដម ថោង ខុន។

 

ជាមួយគ្នានោះឯកឧត្តមអនុប្រធានអចិន្ត្រៃយ៍ CAMSOC ក៏បានលើកឡើង​បន្ថែមទៀត​ថា យើងត្រូវតែមានការចូលរួមបន្ថែមទៀត ដើម្បីឱ្យកម្ពុជាយើងក្លាយជាគោលដៅមួយស្អាត គោលដៅមួយដែលគ្រោះថ្នាក់ចរាចរណ៍ ត្រូវបានកាត់បន្ថយយ៉ាងច្រើន ជាប្រទេសមួយ ដែល​មិនមានឥទ្ធិពលច្រើនពីគ្រោះញៀននេះ។ «ជារួម គឺជាប្រយោជន៍សម្រាប់សង្គមជាតិទាំងមូល ដោយយកព្រឹត្តិការណ៍ស៊ីហ្គេមនេះ ជាឱកាសមួយ សម្រាប់ការអប់រំសង្គម នៅពេលនោះ យើង​អាចកត់សម្គាល់ថា នៅពេលស៊ីហ្គេម កម្ពុជាមិនសូវមានបញ្ហាគ្រឿងញៀន ឬគ្រោះថ្នាក់​ចរាចរណ៍ទៀតទេ ពិសេសគឺកម្ពុជាកាន់តែស្អាត នៅពេលយើងធ្វើម្ចាស់ផ្ទះស៊ីហ្គេមនេះ។ នេះ​ជាបញ្ហាសំខាន់ ដែលយើងត្រូវយកព្រឹត្តិការណ៍នេះ ដើម្បីធ្វើការអប់រំសង្គម និងធ្វើការអភិវឌ្ឍ​កម្ពុជាយើងឱ្យកាន់តែខ្លាំងក្លាថែមទៀត»។

 

ឯកឧត្តម ខៀវ កាញារីទ្ធ រដ្ឋមន្រ្ដីក្រសួងព័ត៌មានបានថ្លែងថា ដើម្បីរួមចំណែក​ដល់​ដំណើរការផ្សព្វផ្សាយឆ្ពោះទៅធ្វើម្ចាស់ផ្ទះ ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ សារព័ត៌​មាន​ពិតជាមានសារៈសំខាន់បំផុត ក្នុងការរួមគ្នាសម្រេចឱ្យបាននូវ​គោលដៅការទទួលធ្វើម្ចាស់​ផ្ទះនេះឲ្យទទួលបានជោគជ័យ។ ជាមួយគ្នានោះ ឯកឧត្តមក៏ត្រៀមរៀបចំធ្វើសិក្ខាសាលា ដើម្បីបញ្ជ្របពីគោលដៅចម្បងៗបន្ថែមទៀតដល់អ្នកសារព័ត៌មាន អ្នកអត្ថាធិប្បាយ​កីឡាឱ្យ​កាន់តែស៊ីជម្រៅបន្ថែមទៀត។ ឯកឧត្តមរដ្ឋមន្រ្ដីបានសង្កត់ធ្ងន់ថា ក្រសួងព័ត៌មានក្នុងកិច្ច​សហ​ការដ៏ជិតស្និទ្ធជាមួយ CAMSOC កំពុងធ្វើសហការជាមួយគណៈកម្មាធិការជាតិអូឡាំពិក រៀបចំ​ជាសិក្ខាសាលា ដើម្បីផ្តល់ជាចំណេះដឹង និងបទពិសោធន៍ដល់ពិធីករ ពិធីការិនី អ្នក​អត្ថាធិប្បាយ និងអ្នកសរសេរព័ត៌មានកីឡាអាចសរសេរបានព័ត៌មានល្អស៊ីជម្រៅ ដើម្បីត្រៀម​ខ្លួនក្នុងដំណើរឆ្ពោះទៅរៀបចំការប្រកួតកីឡាថ្នាក់តំបន់ទាំងពីរផ្នែក ឆ្នាំ២០២៣ នៅកម្ពុជា។

 

ឯកឧត្ដមបានអះអាងថា សិក្ខាសាលានេះនឹងត្រូវរៀបចំឡើងនាពេលឆាប់ៗនេះ ដែល​នឹងបង្កើតចំណេះ​ជំនាញ​ពីការសរសេរព័ត៌មានទាក់ទងនឹងវិស័យកីឡាឱ្យកាន់តែល្អ។ ឯកឧត្តម​រដ្ឋមន្ដ្រីក្រសួងព័ត៌មានគូសបញ្ជាក់បន្ថែមទៀថា កាលពីមុន គេស្គាល់ប្រទេសកម្ពុជា តាមរយៈអង្គរវត្ត និងប៉ុលពត ប៉ុន្តែឥឡូវនេះ តាមរយៈការធ្វើម្ចាស់ផ្ទះព្រឹត្តិការណ៍កីឡា​ជា​ប្រវត្តិសាស្ត្រនេះនឹងបានធ្វើឱ្យមានការផ្លាស់ប្តូរច្រើន តាមរយៈកីឡាដែលបាន​ចេញទៅប្រកួត​នៅក្រៅប្រទេស ជាពិសេសគឺការធ្វើម្ចាស់ផ្ទះការប្រកួតកីឡា ឆ្នាំ២០២៣។

 

ឯកឧត្តម វ៉ាត់ ចំរើន អគ្គលេខាធិការ CAMSOC គូសបញ្ជាក់ដែរថា ការប្រកួតកីឡា​ស៊ីហ្គេម លើកទី៣២ នឹងដំណើការជាផ្លូវការពីថ្ងៃទី៥ដល់ថ្ងៃទី១៧ ខែឧសភា ឆ្នាំ២០២៣ ខណៈ​ការប្រកួតកីឡាអាស៊ានប៉ារ៉ាហ្គេម នឹងដំណើរការពីថ្ងៃទី៣ដល់ថ្ងៃទី៩ ខែមិថុនា ឆ្នាំ២០២៣។ ឯកឧត្ដមបន្ដថា អ្វីដែលសំខាន់ឯកឧត្តមអគ្គលេខាធិការក៏បានស្នើ​សុំដល់ប្រព័ន្ធ​ផ្សព្វផ្សាយទាំងអស់ជួយជំរុញបន្ថែម ក្នុងការបញ្ជ្រាបព័ត៌មានជូនដល់ប្រជាពលរដ្ឋ ជាពិសេស​គឺកាលបរិច្ឆេតនៃព្រឹត្តិការណ៍កីឡាទាំងពីរ ដោយកាលណាប្រជាពលរដ្ឋយល់ច្បាស់​ពីពេល​វេលា​ប្រកួតស៊ីហ្គេម-អាស៊ានប៉ារ៉ាហ្គេម ២០២៣ នោះពួកគាត់នឹងអាចរាប់ថយក្រោយ​នៃរយៈ​ពេលច្បាស់លាស់ ដើម្បីត្រៀមចូលរួមជាមួយគណៈកម្មាធិការជាតិរៀបចំ រួមទាំងស្ថាប័ន្ធពាក់​ព័ន្ធ​ទាំងអស់ឱ្យទទួលបានជោគជ័យជាក់ជាមិនខាន។ បន្ថែមពីលើនេះ ប្រព័ន្ធផ្សព្វផ្សាយអាច​ពន្យល់​ពីព្រឹត្តិការណ៍កីឡា ឆ្នាំ២០២៣ គឺជារបស់ប្រជាជនខ្មែរគ្រប់ៗរូប៕

Leave a Reply

Your email address will not be published. Required fields are marked *